21-ТЕРРОРИЗМ ҲАҚИДА АФСОНА, 27-МУРОЖААТНОМАЛАР, 28-ФУҚАРОЛАРНИНГ ХАЛҚАРО ТАШКИЛОТЛАРГА МУРОЖААТЛАРИ, 51-ДИНИЙ ҲУҚУҚЛАР, 61-ЎҒИРЛАНГАНЛАР, ҲУСНИДДИН НАЗАРОВ

04.08.27-ХАЛҚАРО ТАШКИЛОТларга МУРОЖААТ

БМТ Кийнокларга карши кумитага

АКШ элчихонасига

Буюк Британия элчихонасига

АКШ давлат департаментига

ОБСЕга

Кизил хоч, Хьюман Райтс Вотч, Халкаро Амнистия, Фридум Хаус инсон хукуклари ташкилотларига

УИХЖ, «Эзгулик», «Мазлум», ЎМХХТГ инсон хукуклари ташкилотларига

«Озодлик», Би-би-си, Немис тулкини радиоларига

«Бирлик» харакати, «Эрк» демократик партиясига

Насриддинова Миннурадан

(Тошкент, С. Рахимов тумани,

Ниёзов кучаси, 3/54-55,

тел: 49-36-19)

Мурожаатнома

Ҳурматли жаноблар! Сизларга эътиқоди учун тинимсиз таъқибларга учраётган, жигарбанд фарзанди ўғирлаб кетилган, Худодан бошқа боқувчиси қолмаган мазлума она мурожаат қилмоқда. Мустақиллик байрами яқинлашаётган экан, қалбимдаги қўрқув, даҳшат ва изтироб тобора кучайиб бормоқда.

 

Портлашлар ва қуролли ҳужумлар ортида кимлар тургани кўпчилик қатори менга ҳам қоронғу. Мен бу ишларни кескин қоралайман. Аммо бу ишларни авж олишида ҳукуматнинг қўли бор деб ўйлайман. Мен одам ўғирлаш ишини Ўзбекистон МХХси қилаётганида ҳеч ҳам шўбҳа қилмайман. Менинг ўғлим Назаров Хуснидинни унинг отаси Обидхон қоридан ўч олиш мақсадида МХХ ўғирлаб кетган.

 

Мен байрам арафасида ўзимнинг хавотиримни билдириб, шуни айтмоқчиман-ки, МХХ ўзи ўғирлаган мусулмонларни озод қилиш нияти йўққа ўхшайди. Менинг МХХ раиси, Бош прокурор, Президентга қилган мурожаат, аризаларим натижасиз қолиб кетди. Бунинг устига ҳукумат ўғлимни бедарак йўқолганлар қаторида телевиденияда эълон қилди.

 

Бу яхшилик аломати эмас. Бу билан МХХ бизни алдаб, масъулиятни ўзидан соқит қилиб юбормоқчи бўлаяпти. У ўғирланган мусулмонларни вахшиёна қийноқларга солаётган бўлиши, уларнинг бўйинларига «терроризм», «экстремизм» каби улар қилмаган айбларни қўяётган бўлиши мумкин.

 

Энди мен МХХ бундан ҳам кўра ёмонроқ ишга қўл уришидан қўрқаяпман. МХХ ўзи ўғирлаган мусулмон йигитларнинг белларига портловчи моддаларни боғлаб, бирор ерда портлатиб юбориши ва буни уларнинг устларига юклаб тўҳмат қилиши мумкин, деб ўйлаяпман. Сизлардан илтимосим шу-ки, ўғирланган мусулмонларни қутқариш ишига дунё жамоатчилигининг диққатини кўпроқ қаратишга ёрдам беринглар. Ўзбекистонда терроризм ва экстремизмга қарши кураш тинч мусулмонларга қарши курашга айланиб кетди.

 

Оммавий ахборот воситаларидан бизнинг мусибатларимизга етарли эътибор беришларини сўрайман.

 

Дипломатик идоралардан Ўзбекистон ҳукуматига кўпроқ босим ўтказишларини, ўғирланган мусулмонлар (уларнинг сони 10тага етиб қолди) тақдири билан жиддий қизиқишларини илтимос қиламан.

 

Насриддинова Миннура

Назаров Хусниддиннинг онаси,

Обидхон қори Назаровнинг рафиқаси

 

2004 йил, 27 август.

 

Мурожаатномага МХХ раиси ва Бош прокурорга ёзилган хатлар, ҳамда Назаров Хусниддиннинг сурати илова қилинмоқда.

51-ДИНИЙ ҲУҚУҚЛАР, ҲУСНИДДИН НАЗАРОВ

04.08.15-РУСТАМ ИНОЯТОВга М.НАЗАРОВАдан

Ўзбекистон Республикаси

Миллий хавфсизлик хизмати раиси

Рустам Иноятовга

Нусхаси: Ўзбекистон Республикаси Бош прокурорига

 

Ўзбекистон телевидениясига

 

Инсон хукуки ташкилотларига

 

ОАВга

 

 

Насриддинова Миннурадан

 

(Тошкент, С. Раҳимов тумани,

Ниёзов кучаси, 3/54-55,

тел: 49-36-19)

 

Ариза

 

Ҳурматли Раис жаноблари!

 

Сизга ўғлим Назаров Хусниддинни сизнинг ташкилотингиз томонидан ўғирлаб кетилгани муносабати билан яна хат ёзаяпман.

 

Сизнинг номингизга 15 июнь куни юборган талабнома хатимга мана икки ойга яқин вақт ўтди, жавоб бермадингиз. Хатимга сизнинг ўрнингизга Миллий хавфсизлик хизмати Тошкент шаҳар Бошқармаси ходими Алимуҳамедов Ш. имзоси билан 2004 йил 4 июль куни жавоб келди. Унда «Ўзбекистон Республикаси Миллий хавфсизлик хизмати Тошкент шаҳар Бошқармаси ходимлари фуқаро Назаров Х.О. ни хибсга олмаган» деган қисқа жумла бор. Мен хатга жавобни сиздан кутаяпман. Нима учун Республика МХХси раҳбарига ёзилган хатга шаҳар Бошқармасининг бир ходими жавоб ёзади?

 

Мен сизга ёзган у ва ундан олдинги хатларимда ўғлим Назаров Хусниддинни 2004 йил 16 май куни шом намозига кетаётганда уйимиз олдидан ўғирлаб кетишганини ва мен бу ишни сиз бошчилик қилаётган ташкилот ходимлари томонидан амалга оширилган деб билишимни айтдим. Аммо ҳеч бир натижа бўлмади. Сиз менга бирор марта жавоб бермадингиз.

 

Мен сизга яна хат ёзиб ўғлимни қайтариб беришингизни ёки у ҳақда бирор маълумот беришингизни талаб қиламан.

Менинг даъволаримдан бири шуки, С. Раҳимов туман ички ишлар ходимлари Хусниддиннинг 188-89-66 рақамли сотовий телефониидан кимларга боғланилганини текшириб кўришди. Ундан кимга қилинган ва унга кимлар телефон қилганини суриштиришди. Мутлақо бу ишга алоқаси йўқ одамларни чақириб тергов ўтказишди.

 

Бироқ Хусниддин шом намозига чиқиб кетишидан олдин унга ким телефон қилганлиги ҳалигача номаълум ва сирлигча қолаяпти. Унга ўша куни соат 19-30 билан 19-45 орасида кимдир телефон қилиб пул қарз бериб туришни сўраган. У бироз иккиланиб туриб хўп майли, ҳозир учрашамиз сиз билан”, деб чиқиб кетган. Аммо шундан кейин қайтиб келмади. Унга 2004 йил 16 май шом намози олдидан, яъни, кеч соат 19-30 билан 19-45 орасида телефон қилиб, уни чақириб олган одам ким эди? Буни албатта сизлар биласизлар. Уни сизлар уюштиргансизлар. Бўлмаса, нима учун буни аниқламаяпсизлар?

 

Ички ишлар ходимлари Хусниддин боғланган телефонларнинг ҳаммасини кўтариб текширишган. Аммо у йўқолган куни қилинган телефон рақамларини текширишмаган. Нима учун? Бунинг сабаби сизларга маълум. Биз телефон стансиясига бориб ўша 2004 йил, 16 май куни Хуснидиннинг телефонига қилинган телефон рақамларини билиб беришни сўрадик. Аммо улар буни беришдан бош тортдилар. Улар буни фақат ҳукумат органларининг ходимларигагина беришларини айтишди. Сизлар ўша кунги телефон номерларини нима учун кўтармаяпсизлар ва нега бу ҳақдаги маълумотни мендан яшираяпсизлар?

 

Кеча, 2004 йил 14 август куни, Ўзбекистон телевиденияси орқали Назаров Хусниддиннинг сурати кўрсатилиб, унинг йўқолиб қолгани эълон қилинди. Мен бу ҳолатдан қўрқувга тушаяпман. Сизлар ўғлимга бирор ёмонлик қилишга қасд қилдингларми? Уни майибмажрух қилиб ёки ўлдириб бирор ерга ташлаб кетишни режа қилганмисизлар?…

Биламан, сизлар қонунга риоя қилмаяпсизлар. Аммо Худодан ҳам қўрқмайсизларми? Нима учун бир бечора онага ва бегуноҳ болага, унинг оила аъзоларига бунчалик зулм ўтказасизлар? Ахир биз сизларга ҳеч бир ёмонлик қилганимиз йўқку! Агар Обидхон қори сизларнинг ғайри қонуний талабингизни бажармасдан, яъни МХХ билан махфий ҳамкорлик қилишдан бош тортиб, сизларни ғазабингизни келтирган бўлса, марҳамат уни топиб, ўзини жазоланглар!

 

Нима учун унинг ўғлидан, қариндошларидан ўч олаяпсизлар??! Бу қайси тоифанинг қонунига тўғри келади? Ўғриларнингми? Манимча ўғрилар ҳам сизларни ишингизни қораласа керак. Чунки ўғриликни ўғрилар қилади. Аммо давлат ўғри бўлиши мумкин эмас-ку. Давлат очиқойдин иш қилиши керак эмасми?

Сизларга ва бутун оламга эшиттириб айтаман: бизнинг оила давлатга қарши куч ишлатишга асло рози бўлмаган ва бўлмайди. Бунақа портлатишлар, қуролли ҳужумларни Обидхон қори доимо қоралаб келганлар. Хусниддин ҳам отасининг тарбиясини олган. Унинг ҳеч қандай айби йўқ сизларнинг одингизда! Агар у бирор ғайри қонуний ҳаттиҳаракат қилганида албатта сизлар уни аямаган бўлардингиз, ошкора ушлаб қамаган бўлардингиз. У шунинг учун ҳам ўзини эҳтиёт қилиб юрган, ҳеч қанақа тоифага қўшилмаган.

 

Бироқ сизлар ундан отаси учун ўч олаётганингизни бутун мамлакат, бутун дунё билиб тушуниб турибди. Иймоним комилки, бизнинг оилани мусулмон дунёси ҳам, Ғарб дунёси ҳам қонундан ташқари ишларга ҳеч қандай алоқамиз йўқлигини яхши билади. Обидхон қорининг, демак бизнинг ягона айбимиз – мусулмонларга сизлар ўтказаётган қатағонларни қоралаймиз.

 

Сизлар биздан айнан мана шу учун ўч олаяпсизлар. Аммо бундан нима натижага эришиб бўлади?? Бунақа қўполлик, қўрқитув, зулм билан сизлар мақсадингизга ҳеч қачон ета олмайсизлар-ку. Нима учун сизлар шу оддий ҳақиқатни тушунишни истамаяпсизлар, мен шунга ҳайронман.

 

Сизларга катта фойда келтирадиган маслаҳат шуки, Хусниддинни ва бошқа ҳамма ўғирланганларни қўйиб юборинглар. Қамоқдагиларни озод қилинглар. Шунда ютуқ сизларда бўлади иншаАллоҳ. Бу биз мазлумлар учун ҳам, халқ учун ҳам, давлат учун ҳам яхши йўл. Ахир яхшиликка яхшилик қайтишига нимага ишонмаяпсизлар? Ёки ёмонлик билан яхшилик ҳосил бўлади деб ўйлайсизларми?

 

Мен энг аввало ўзимга кейин бошқаларга, жумладан Сизга, сизнинг ходимларингизга, ҳукуматнинг ҳамма аъзоларига иймонҳидоят, инсоф, раҳм-шафқат тилайман. Аллоҳ ҳаммамизни яхши ниятларимизга фақат яхши йўллар билан эришишни насиб қилсин.

 

Сиздан бир мазлума она сифатида қўл остингиздаги махбусларни, мазлумларни, жумладан менинг ўғлим Хуснидинни, қийноққа солмаслигингизни, майиб-мажрух қилмаслигингизни, таҳқирламаслигингизни, ўлдириб қўймаслигингизни ўтинаман. Аллоҳнинг бандаларга қандай муомала қилсангиз худди ўшанақа муомалани албатта ўзингиз ва болаларингиз ҳам кўрасизлар. Ҳеч кимни ҳаққи ҳеч кимда қолиб кетмайди. Ҳеч бир зулм жавобсиз қолмайди. Яхшилик ҳам мукофотсиз қолмайди. Сиздан ўғлимни тез кунлар ичида озод қилиб юборишингизни кутиб,

 

Насриддинова Миннура

Назаров Хусниддиннинг онаси,

Обидхон қори Назаровнинг рафиқаси

 

2004 йил, 15 август

 

Хатга 15 июн куни МХХ раисига ёзилган хат илова қилинмокда.

 

 

28-ФУҚАРОЛАРНИНГ ХАЛҚАРО ТАШКИЛОТЛАРГА МУРОЖААТЛАРИ, 51-ДИНИЙ ҲУҚУҚЛАР, 61-ЎҒИРЛАНГАНЛАР, ҲУКУМАТ МУСУЛМОНЛАРГА ҚАРШИ, ҲУСНИДДИН НАЗАРОВ

04.07.26-БМТ КИЙНОҚЛАРГА ҚАРШИ КОМИТЕТИ РАИСИга

БМТ Қийноқларга Қарши қўмита раисига

Насриддинова Миннурадан

(Тошкент ш, С. Раҳимов тумани,

Ниёзов кўчаси, 3/54-55, тел: 49-36-19)

 

АРИЗА

 

Khusniddin NAZAROV

Ҳурматли Раис жаноблари, Сизнинг ва қўмитангизнинг дунё мамлакатларидаги, жумладан Ўзбекистон хибсхоналаридаги махбусларнинг ахволини яхшилаш йўлида олиб бораётган хайрли ишларингиз таҳсинга сазовордир. Умид қиламанки, бу ариза орқали мен ҳам сизнинг ёрдамингизни олишга эришаман.

 

Аввал оммага маълум қилганимдек, менинг ўғлим Назаров Хусниддинни 2004 йил 16 май куни шом намозига кетаётганда уйимизнинг олдидан ўғирлаб кетишди. Мен бу ишни ўғлимнинг отаси, 1998 йилдан бери қидирувда бўлган имом Обидхон Назаровдан ўч олиш мақсадида Ўзбекистон МХХ ходимлари томонидан амалга оширилган деб биламан.

 

Мана орадан 2 ойдан кўп вақт ўтиб кетди. Аммо ҳукумат органларига қилган мурожаатларим ҳеч бир натижа бермаяпти. МХХга 5 марта ариза ёздим. Президентга, Бош прокурорга ва бошқа идораларга ёздим. Аммо улар бу масалага аҳамиятсизлик билан қарамоқдалар. Бу ҳам ўғлимни ҳукумат ўғирлаганидан далолат беради.

 

ИИВга тегишли идоралар ходимлари ҳам ўз сўзларида Хуснидинни МХХда бўлиши мумкинлигига ишора қилмоқдалар. Аммо МХХ менинг хатимга икки ойдан сўнг жавоб ёзиб, Назаров Хуснидин ҳақида ҳеч нима билмаслигини айтди. Биз бундай одам ўғирлаш ишларини фақат МХХ қилган деб 100 фоиз ишонамиз. Чунки ўзбек ҳукумати, хоссатан МХХ (КГБ) бетараф мусулмонларга қарши Совет Иттифоқи давридан бошлаб курашиб келади.

 

Менинг турмуш ўртоғим Тошкентдаги “Тўхтабой” номли жомеъ масжиднинг собиқ имоми Назаров Обидхон қорини МХХ тазйиқ остига олиб имомликдан бўшаттирди (1996 й.). Кейин қамоққа олишга ҳаракат қилди ва мамлакатдан қувиб чиқарди (1998 й.). У кишининг «айби» шу эдики, дин эркинлиги халқаро ва маҳаллий қонунлар доирасида амалда татбиқ қилинишини истар эди.

 

У киши одамларнинг ўз эркинликларини қўлга киритишлари учун қуролли воситаларга мурожаат қилишларига ҳам, ҳукуматнинг тинч мусулмонларга қарши репрессиялар ўтказишига ҳам қарши эди. Ҳукумат эса қонунларга амал қилишнинг ўрнига Обидхон қоридан ўч олишга ўтди. У кишини қамашга муваффақ бўла олмагач, икки укаси (Назаров Абдумалик, Назаров Умархон) ва тоғасини, шу билан бир қаторда менинг укамни ва ўзимни ҳам қамоққа олди.

 

Инсон ҳуқуқи ташкилотларининг ҳаракатлари сабабли турли муддатлар ўтаб озодликка чиқдик. Аммо Обидхон қорининг укаси Назаров Умархон ҳали ҳам Қаршидаги УЯ 64/49 қамоқхонасида азобланиб ўтирибди. Репрессияга учраган имомнинг қариндоши бўлгани учун унга бирон марта амнистия қўлланилмади.

 

Бугун бизни даҳшатга солаётган нарса шу-ки, ўзбек ҳукумати шу кунгача мусулмонларга ва бизнинг оилага қарши ўтказиб келган қамоққа олиш ва қийноққа солиш каби жазо усулларидан қониқмаётганини ҳис қилаяпмиз. Энди МХХ Сталин даврида ҳам эшитилмаган разил усулни қўллаяпти. У мусулмон эркакларни ўғирлаб кетаяпти.

 

Бу иш шунақа ҳам қўрқинчлики, бундан кўра ўғилларимизга наша, ўқ-дори, қурол солиб қўйиб тўҳмат қилиб қамоққа олса ҳам мингдан минг рози бўлардик. Чунки шунда биз ҳар ҳолда уларни бориб кўриб келиб турар эдик. Аммо ҳозир эса биз ўғилларимизнинг на тиригини биламиз на бошқасини.

 

МХХ мусулмонларни ўғирлаб кетиш амалиётини 1993 йили бошлаган. 1993 йили Абдулла Ўтани уйининг олдидан, 1995 йили имом Абдували қорини Тошкент аэропортидан ўғирлаб кетган. Энг даҳшатлиси шуки, мусулмонларни ўғирлаб кетиш воқеаси ҳозирги вақтга келиб қисқа вақт ичида кетма-кет содир бўлмоқда.

 

Саъдуллаев Дилмурод (Тошкент тумани), Юнусов Оқилжон Азизжонович (Тошкент шаҳар, Қибрай тумани), Ҳайдаров Фаррух Акмалович (Тошкент шаҳар, Яккасарой тумани) оддий намоз ўқийдиган йигитлар эди. Хусниддин ва бу йигитларнинг ҳаммаси 1 ой ичида ўғирлаб кетилди. Бу пасткаш жиноят ҳукумат томонидан бундан кейин ҳам яна такрорланди.

 

2004 йил 14 июль чоршанба куни кечқурун Исманходжаев Равшан Султонович (Тошкент шаҳар, Мирзо Улуғбек тумани, Оққўрғон кўчаси, 12-а уй), Раҳимов Абдурасул Абдурашидович (Тошкент шаҳар, Шайхонтоҳур тумани, Уйғур кўчаси, Билдириш проезди, т. 1, 12-уй) ўғирлаб кетилган. 2004 йил 1 июль куни ҳам яна мен исмларини тўлиқ билмайдиган иккита мусулмон йигит ўғирланганини менга айтиб беришди.

 

Мен ва мен каби ўғли ўғирланган бошқа оналар фарзандларимизни МХХнинг яширин ертуласида қийноққа солинаётган бўлишидан ёки ўлдириб юборилишидан қаттиқ хавотирдамиз.

 

Ҳурматли Раис жаноблари! Сиздан Ўзбекистон ҳукуматига ўз имкониятингиз билан босим ўтказишингизни, менинг ўғлим ва бошқа фуқароларнинг фарзандларини қутқаришга ёрдам беришингизни қаттиқ илтимос қилиб сўрайман.

 

МХХ раиси Р. Иноятовга ёзган хатимни маълумот учун бу хатга илова қилаяпман.

Сизга хурмат билан

 

Насриддинова Миннура

 

2004 йил 26 июль.

 

 

21-ТЕРРОРИЗМ ҲАҚИДА АФСОНА, 51-ДИНИЙ ҲУҚУҚЛАР, 61-ЎҒИРЛАНГАНЛАР, ҲУСНИДДИН НАЗАРОВ

04.06.15-ТАЛАБНОМА

 

Ўзбекистон Республикаси

Миллий хавфсизлик хизмати раиси

Рустам Иноятовга

 

Насриддинова Миннурадан

 

(Тошкент, С. Раҳимов тумани,

Ниёзов кўчаси, 3/54-55,

тел: 49-36-19)

 

ТАЛАБНОМА

 

Ҳурматли Раис жаноблари!

 

Сизга маълум-ки, менинг ўғлим Назаров Хусниддинни 2004 йил 16 май куни шом намозига кетаётганда уйимизнинг олдидан ўғирлаб кетишди. Мен бу ишни сиз бошчилик қилаётган ташкилот ходимлари томонидан амалга оширилган, деб билишимни олдинги аризаларимда баён қилдим. Мана шунча кундан бери бирор яхши хабар бўлиб қолармикин, деб кўзим тўрт, юрагим қон бўлиб кутдим. Аммо ҳеч бир натижа бўлмади.

 

Энди сизга яна бир марта хат ёзиб мен ўғлимни фақат сизлар ўғирлагансизлар, деб билишимни такрорлайман ва сиздан ўғлимни уйга қайтаришингизни ёки у ҳақда бирор хабар беришингизни сўрайман.

 

Сизлар жуда катта ва хунук хато иш қилдинглар. Бунақасини ҳеч ким кутмаган эди сизлардан. Сизлар ўзингларни жуда ҳам салбий томондан кўрсатдинглар. Одам ўғирлаш ахлоқсиз, пасткаш кишиларнинг иши. Биз сизларнинг мусулмон қизларнинг рўмолини, йигитларнинг соқолини ёқтирмаслигингизни, уларга қарши кураш олиб бораётганингизни биламиз.

 

Аммо мусулмонларнинг фарзандларини ўғирлаб кетишдек пасткаш ишга қўл уришларингизни ўйламаган эканмиз. Яъни, барибир сизлар ҳам одамсизлар, одамзодда виждон бўлади, бунинг устига ораларингизда ўзини мусулмон санайдиганлар бор-ку, деб сал бўлса ҳам ишонар эдик сизларга. Аммо биз бу воқеадан сўнг ниҳоятда ҳайрат, даҳшат ва изтиробга тушиб қолдик.

 

Сизлар ўзинглар терроризмга қарши кураш олиб бораяпмиз, деб айтасизлар. Аммо ўзинглар халқни террор қилиш билан шуғулланаяпсизлар. Мана энди одам ўғирлашга киришдинглар. Бунақада қанақа қилиб терроризмни йўқ қиласизлар? Ёшларни қанақа хатарли йўлларга ундаяпсизлар? Ёшларга ҳатто жиноятчиларнинг ҳам ҳаёлида йўқ ишларни ўргатмоқчимисизлар? Нима мақсадда бунақа иш қилдинглар?

Сиздан қўл остингиздаги ходимларингизга бу хатони тез тўғрилашга буйруқ беришингизни сўрайман. Менинг боламни қайтариб опкелинглар уйга. Агар уйимизга соғ-саломат ҳолида олиб келиб берсанглар, биз ҳам сизларнинг обрўларингизни сақлаймиз, «ўғлимиз ўзи кетиб қолган экан, ўзи қайтиб келди», деб қўя қоламиз. Агар соғ-саломат опкелсанглар сизларга ҳеч қанақа даъво қилмаймиз.

 

Сизнинг ҳам, ходимларингизнинг ҳам хотин-бола чақаларингиз бор. Баъзиларингизнинг ота-онангиз бор. Ўшаларни кўз олдингизга келтиринг. Бир ожиза инсоннинг боласига зулм қилманг. Сизга ўзингизнинг болангиз қандай азиз бўлса, бошқанинг боласи ҳам унга шунақа азиз.

 

Сизларнинг ҳаммангиздан илтимос қилиб сўрайман. Ўғлимга азоб берманглар, уриб-қийнаманглар. Қийноққа солманглар. Унга бирор жароҳат етказиб, бирор ерга ташлаб кетманглар асло!

 

Мен аввало Аллоҳдан умид қиламан. Кейин сизларнинг ичингизда барибир инсофли одамлар бор-ку, деган фикрдаман. Сизлардан қаттиқ илтимос қилиб сўрайманки, болага зарар етказманглар.

 

Мана ўғлимни олиб кетганларингиздан бери 21 кун ўтди, ундан сўрайдиган нарсангларни сўраб, оладиган нарсангларни олиб бўлдинглар. Бўлди қилинглар энди. Қайтаринглар уни. Қанча кўп кун ўтса, сизларнинг жиноятларингиз шунча оғирлашаверади. Қанча кўп вақт ўтса сизларга қарши нафрат шунча кучаяверади. Агар сизлар мусулмон бўлсанглар Аллоҳдан қўрқинглар. Онанинг дуоси, қарғишидан қўрқинглар.

 

Аллоҳга қасам ичиб айтаман-ки, бу разил ишни қилганлар боласидан кўрсин, фарзанд доғида қолсин. Ўзи ҳам хорлик ва азоб-уқубатга гирифтор бўлсин! Агар болам соғ-омон қайтмаса, мен ўлгунимча барчаларингизни қарғаб ўтаман ва Аллоҳдан уларни ҳам хор бўлганини, қолган умри афсус-надомат ичида ўтишини, ва буни мазлум халққа шу дунёда кўрсатишини Аллоҳдан ўтиниб сўрайман. Сизлар мен каби бечораларнинг жуда кўпчилигига зулм қилдинглар.

 

Агар сизлар ўғлимни қайтариб опкелсанглар, бўлди, мен ҳамма даъвойимдан тўхтайман.

 

Биздан нима истайсизлар, нима талаб қиласизлар ўзи? Талабингиз, шартингизни айтинглар – мен бажараман, иншаАллоҳ! Аммо боламни сотиб олишга пулим йўқ. Сизлар бу ишни пул учун қилмагансизлар ҳам.  

 

Эсингизда бор, сизнинг ходимларингиз катта куч сарфлаб 1995 йили оиламизнинг отаси Обидхон қорини имомликдан ноҳақ бўшаттирдинглар. 1996 йилдан 1998 йилгача бизни қонуний яшаб турган уйимиздан ҳайдаб чиқаришга кўп уриндинглар.

 

1996 йилларда идорангизнинг С.Раҳимов тумани бўйича вакили Тоҳир Иброҳимов, яна сизнинг бир мансабдорингиз Рихсибой Деҳқонбоев ва ҳозирча мен номини айтмайдиган бир қанча хизматчилар бизнинг оилага, хонадонимизга, менинг турмуш ўртоғим Обидхон қори Назаровга қарши жуда катта кураш олиб бординглар. Сизларнинг дилларингизда бизга қарши қаттиқ адоват ва алам борлиги бизнинг оилага ва қариндошларимизга қилиб келган тазйиқларингиздан маълум.

 

Бундан жуда кўпчилик яхши хабардор. Оддий мусулмонлар ҳам, халқаро ташкилотлар ҳам, баъзи давлатларнинг элчихоналари ҳам бу можароларда сизларнинг мутлақо ноҳақ бўлганликларингизни яхши билишади. Турмуш ўртоғим Обидхон қори сизлардан фақат давлат қонунларига амал қилишнгизни талаб қилган эди холос, шариат қонунларига эмас! У кишининг бор айблари шу эди.

 

Яна саволимни такрорлайман: Биздан нима кутасизлар, нима талаб қиласизлар? Айтинглар, қўлимиздан келганича бажарамиз. Фақат ўғлимни соғ-саломат ва тирик қайтариб беринглар, бўлди!

 

Агар боламни қайтариб бермасанглар мен тинчимайман. Бу биринчиси.

 

Иккинчидан, одамлар ҳам бу ишни қаттиқ қоралашаяпти. Сизлар бу оилага янгидан ҳужум бошлаб катта хато қилдинглар. Шу режани ким ишлаб чиққан бўлса ҳам у ақлсиз ва ахмоқ кимса экан. Унақа калтабин, узоқни кўролмайдиган одам ишламаслиги керак хавфсизлик органларида. Биз хавфсизлик ташкилотларини, умуман олганда, асли зоти билан ёмон ташкилот деб айтмаймиз. Хавфсизлик органлари керак ташкилот. Хавфсизлик идоралари халқни, давлатни тинчлигини сақлаш учун керак ташкилот деб биламиз. Аммо бу ташкилот ниҳоятда ақлли одамлар ишлайдиган ташкилот бўлиши керак эди.

 

Нима учун сизларни ичингизда бунақа ўғрилик билан шуғулланадиган одамлар ишлайди? Нима учун яна одам ўғирлаш усулини қайта бошладинглар?

 

Сизлар яхши билиб қўйинглар: Обидхон қорининг оиласи, хонадони сизларга ёмонлик қилиш нияти йўқ. Биз энг ашаддий душман ҳам Аллоҳ хоҳласа энг яқин дўстга айланиши мумкин деган эътиқоддамиз. Ислом душманга ҳам инсоф билан муомала қилишга буюради. Душманинг бир кун келиб дўстга айланиб қолганда унга қилган душманликларинг учун афсусланиб юрадиган бўлма, яъни, душманлик қилишда ҳаддан ошма, дейди. Бизда сизлардаги каби чексиз кек-адоват йўқ.

 

Биз тинчлик тарафдори бўлиб келганмиз, иншаАллоҳ умримизнинг охиригача шу таълимотга содиқ қоламиз. Бизга ота-оналаримиз шундай таълим беришган. Обидхон қорининг таълимотлари ҳам шундай бўлиб келган. Биз иншаАллоҳ умримизнинг охиригача шу таълимотга содиқ қоламиз. Агар биз ҳам нотинчликни хоҳлаганимизда, унда нотинчилк келтириб чиқарадиганларга қўшилган бўлардик. Аммо биз буни ҳаром ва катта гуноҳ деб биламиз.

 

Бироқ сизлар бизнинг жигарбандимизни ўғирладингиз, қийноққа солсангиз ёки, Аллоҳ асрасин, ўлдирсангиз ҳам бўлаверар экан, деб ўйламанг. Ал-қасосу минал ҳақ деганларидек, ёмонлик сиз кутмаган ердан, оёғингиз остидан чиқади. Бунга бизнинг имонимиз 100 фоиз комил. Аллоҳ Қуръонда айтади: «Ёвуз макр фақат ўз эгасига қайтади!». Сиз ҳам бир куни, иншаАллоҳ, албатта кўрадиганингизни кўрасиз. Ўшанда Аллоҳнинг борлигини биласиз. Ҳа, Худо бор экан, дейсиз.

 

Ёмонлик кўриш навбати сизларга келганда сизлар ҳам Аллоҳдан ва ўзингиздан кўрарсизлар. Биз ҳам бу мусибатни энг аввало ўзимизидан кўрамиз. Бу ишлар ўзимизнинг Аллоҳ олдидаги гуноҳларимиздандир. Аммо бу ёмонлик сизнинг ташкилотингизнинг қўли билан бажарилгани учун бунинг масъулияти сизларнинг бўйнингизга юкланади. Биз Аллоҳга товба қиламиз, сабр қиламиз ва бу мусибатдан ажр оламиз, иншаАллоҳ. Аммо сиз агар ўғлимни қайтариб бермасангиз, улкан гуноҳ билан, разил жиноят билан қолиб кетасиз. Сизни тарих ҳам қоралайди. Ислом ҳам, мусулмонлар ҳам, ўзингизнинг келажак авлодларингиз ҳам.  

 

Менинг бу хатим сизнинг ё фойдангизга ёки зарарингизга ҳужжат. Сизнинг бизни оилага бошлаган янгича, ўғри ҳам, тўғри ҳам оқламайдиган услубдаги ҳужумингиз сизга қанақа оқибатларни олиб келишини Аллоҳ билади.

 

Яна бир ҳақиқат. Биз ҳозир ҳукумат сиёсатини яхши кўрмаётган бўлсак ҳам, бироқ унга, яъни сизларга фойда келтириб ўтирибмиз. Одамларни сабр қилишга чақираяпмиз. Илм, одоб бериш билан ҳам, чиройли даъват қилиш билан ҳам, ота-онага хизмат қилиш билан ҳам жиҳод савобини олиш мумкин эканлигини айтиб келаяпмиз.

 

Умид қиламанки, бу сўзларим бир-биримизни тўғри тушуниш учун кифоя қилади ва сизлар узоқ ўйлаб ўтирмасдан боламни тез уйга қайтарасизлар. Агар ўғлимнинг бирор айби бўлса, сиз бизнинг адвокатимиз иштирокида тергов ўтказиб, Хусниддиннинг айбини исботлаб судга топширинг.

 

Сиздан 3 кун муддат ичида бу хатимга жавоб беришингизни сўрайман. Чунки мен боламнинг тақдиридан ниҳоятда тавишдаман. Менинг аввалги мурожаатларимга сиз ҳам, бош прокурор ҳам, президент ҳам, туман ва шаҳар даражасидаги бошқа идорлар ҳам, ҳеч бирингиз жавоб қайтармадингиз.

 

Мен сиз ва ходимларингиз ўғлимни қийноққа солаётган бўлишингиздан, унга жиддий жароҳат етказиб қўйишларингиз ёки ҳалок этишларингиздан қўрқаяпман.

 

Агар сиз ўғлимни қонуний йўл билан тергов қилмоқчи бўлсангиз, 3 кун ичида зудлик билан адвокатимиз Ирина Микулинани чақириб, унга ўғлимни кўрсатишингизни, ишга И.Микулинани жалб қилишингизни талаб қиламан.  

 

Агар бу сўзларимга ижобий жавоб бермасангиз, ўғлимни уйга соғ-саломат қайтармасангиз, ёки уни менга соғ-саломат кўрсатмасангиз, ё эса уни адвокатимга кўрсатмасангиз, унда айни хатимни оммага эълон қилишга бошлайман. Унинг нусхасини президентга, бош прокуратурага, хорижий давлатларнинг элчихоналарига, оммавий ахборот воситаларига, халқаро ва маҳаллий инсон ҳуқуқи ташкилотларига тарқатаман.

 

Аллоҳдан яхши умидлар қилган ҳолда ўғлимнинг соғ-саломатлиги ҳақидаги хабарни кутиб:

 

Насриддинова Миннура

Назаров Хусниддиннинг онаси,

Обидхон қори Назаровнинг рафиқаси

 

2004 йил, 15 июн

27-МУРОЖААТНОМАЛАР, 51-ДИНИЙ ҲУҚУҚЛАР, ҲУСНИДДИН НАЗАРОВ

03.04.08-МАҲАРРАМХОН НАЗАРОВА МУРОЖААТИ

Бисмиллахир Рохманир Рахийм

 

БМТ, ОБСЕ, ХРВ, Халкаро Амнистия, Фридум Хаус ва

инсон ҳуқуқларини ҳимоя қилувчи барча ташқилотларга

Би-би-си,

«Озодлик»,

Америка овози

ва бошқа ОАВга

Барча яхши ниятли кишиларга

 

Обидхон қорининг онаси Муҳарамхон Назаровадан

 

Мурожаат

 

Ҳурматли яхши инсонлар! 2003 йил, 4 апрель жума куни менинг оила аъзоларим ва фарзандларимга Ўзбекистон ҳукумати томонидан ўтказиб келинаётган тазйиқларнинг янги тўлқини бошланди. Шу куни менинг кенжа ўғлим Назаров Абдумаликни Тошкент шаҳар ички ишлар бошқармаси ходимлари ноқонуний равишда қамоққа олди.

 

Абдумалик 1996 йилдан то 2003 йилгача Жаслиқ, Товоқсой, Поп, Зарафшон зоналарида бўлиб қаттиқ азоблар тортган, яқиндагина амнистия қўлланиб қамоқдан озод бўлиб чиққан эди. Ўртанча ўғлим Назаров Умархон ҳали ҳам Қарши қамоқхонасида ўтирибди. Яна бир неча қариндошларим ҳар хил қамоқхоналарда азоб чекишмоқда.

 

4 апрель куни кечқурун Абдумалик Намангандан Тошкентга келган, акаси Обидхон қорининг хонадонида меҳмон бўлиб, жиянларини зиёрат қилмоқчи бўлган эди. У ҳали уйга кириб улгурмасдан эшик остонасига энди яқинлашган пайтда орқасидан етиб келган бир гурух қуролли орган ходимлари томонидан куч ишлатилиб олиб кетилди.

 

Милиционерлар аввал ҳеч қандай ордерсиз Обидхон қорининг уйига бостириб кириб тинтув қилган, худди қайсидир жиноятчини қидираётгандек уйларни бирма-бир текшириб чиққан. Шундан кейин Абдумаликни олиб кетган. Милиция ходимлари Обидхоннинг ўғли набирам Хусниддин Назаровни ҳам сўкиб, ҳақоратлаб, туртиб, судраб олиб кетмоқчи бўлган.

 

Аммо қўни-қўшнилар, аёллар, болалар кўплашиб уни милиционерларнинг қўлидан тортиб чиқариб уйга киритиб юборишган. Хусниддин уй эшигини ичидан қулфлаб олгач, босқинчилар ноилож орқага қайтган. Улар шу ерда бўлган қўшни хонадоннинг фарзанди Абдураҳмон исмли ёш йигитни ҳам хибс қилиб, Собир Раҳимов тумани ички ишлар бошқармасига олиб бориб қамаган.

 

Ҳурматли яхши инсонлар! Барчангизга маълумки, Ўзбекистон ҳукуматининг мусулмонларга қарши олиб бораётган кураши тўхтамаяпти. Қамоқхоналарда қийноқлар давом этмоқда. Қамалганларнинг оила аъзоларини қўрқитиш, камситиш, уйларини қонунсиз тинтув қилиш, яна бошқа қариндошларни қамоққа олиш тез-тез содир бўлаяпти.

 

Менинг Намангандаги уйим ҳам, Тошкентда Обидхон қорининг уйи ҳам доим назорат остида. Уйимизга бир инсон меҳмон бўлиб келиши биланок орқасидан милиционерлар, қуролланган аскарлар келади. Уйни тинтув қилади. Ҳаммамизни ҳақоратлайди. Бу босқинчилар кексаларни танимайди, оналар демайди, аёлларни ҳурмат қилмайди, болаларга раҳм нималигини билмайди. Инсонни оёқ-ости қилади.

 

Бу ҳолатлар бир неча йиллардан бери такрорланади. Мана энди бўлса неча йиллардан бери кўзларим тўрт бўлиб кутганим боламнинг дийдорига тўймасимдан туриб яна қамоққа олди. Ҳозир у Тошкент шаҳар ички ишлар бошқармасининг ертўласида. Мен ўғлимнинг Жаслиқ ва бошқа қамоқхоналарда бўлган пайтларида қаттиқ қийноқларга солинганини ҳеч эсимдан чиқармайман. Унинг танасида сурункали калтаклар асоратларини кўрганман.

 

Уни ваҳший милиционерлар ҳозир ҳам қийноқка солаётган бўлиши эҳтимол. Ундан акаси Обидхон қорининг ўчини олишаяпти. Ундан тергов пайтида доим шу саволни сўрашади. Акасининг қаерда эканини айтиб беришни талаб қилишади. Холбуки, Абдумалик қамалган пайтда Обидхон қори ўз уйида эди. Абдумалик қаердан билсин акасининг қаердалигини?

 

Мен барча яхши ниятли кишиларга, инсон ҳуқуқи ташқилотларига олдиндан ташаккуримни айтиб, улардан менинг ўғлимни ва бошқа мусулмон махбусларни озод этишга ёрдам кўрсатишларини илтимос қиламан. Ҳакгўй, ҳалол, иймонли журналистларга ҳам Аллоҳдан мадад сўрайман. Уларнинг яна ҳам журъатли ва ғайратли бўлишларини умид этаман.

 

Авваламбор ўзимга, кейин менга ўхшаган мазлума оналарга, турмуш ўртоғидан ноҳақ айрилган келинларга, бошига мусибат тушган барча мусулмонларга сабр тилайман. Кўпроқ ибодат ва дуо қилишимиз кераклигини, бу ҳаётдан Охират афзал эканига қатъий иқрор бўлишимиз лозимлигини эслатаман. Аллоҳдан золим милиционерларга инсоф сўрайман. Улар мусулмонларни тергов қилаётганда, айбдорми-айбсизми, Аллоҳнинг бандаларига азоб бераётган пайтларида ўзларининг оналарини, хотин-бола-чақаларини кўз олдиларига келтиришлари керак.

 

Улар қилаётган зулм ва зўравонлик тез фурсат ичида Аллоҳдан қайтишига, бу ишларининг касофати ўзларига, бола-чақаларига қайтиб урилишига иймоним комил. Уларнинг бизга эмас, ўзларига, ўзларининг ота-оналарига, бола-чақаларига раҳмлари келсин. Фалончи золимнинг авлоди деган иснод қолади улардан. Уларнинг ота-оналари, оила аъзолари, қариндош-уруғлари ўз яқинларини бундай гуноҳ ишлардан, зўравонликдан қайтаришлари керак.  

 

Ўзбекистон ҳукумати фақат менинг ўғилларимни эмас, қамоқхонадаги ҳамма мусусулмонларни озод қилиб юбориши шарт. Ҳукумат раҳбарларини Аллоҳдан қўрқишга, халқнинг, мазлумларнинг дуосидан сақланишга, ўзлари йўл қўйган хатоларини тузатишга даъват қиламан.

 

Шу муноасабат билан Ўзбекистонда дин эркинлиги тўла таъминланган, мусулмонлар бемалол ўз ибодатларини бажо қилиб юрибдилар, дегувчилар Аллоҳдан ва халкдан ҳаё қилишлари кераклигини айтиб ўтайин. Улар «ҳеч ким ноҳақ қамалаётгани йўқ, қамоқхонада ҳеч қандай азоб берилаётани йўқ, ҳаммаси қонуний кетмоқда» деб, ҳам ёлғон гапираяптилар, ҳам қонунларни ерга ураяптилар. Бу билан улар Ўзбекистон қонунларини адолатли эмаслигини тасдиқлаяптилар. Мен Ўзбекистонда давом этаётган зулм ва зўравонликка тирик гувоҳ бўлган неча минглаб оналарнинг бириман.

 

Аллоҳ барчамизга сабот, матонат берсин. Махбусларга нажот ато қилсин.

 

М. Назарова

 

2003 йил, 8 апрел, душанба.

МУРОЖААТлар, ҲУСНИДДИН НАЗАРОВ

03.03.07-ҚАШҚАДАРЁ ПРОКУРОРИ Эшдавлат ЖЎРАЕВГА

7 март 2003 й.                                               

                                                                        

 

ҚАШҚАДАРЁ ВИЛОЯТИ ПРОКУРОРИ

Эшдавлат Турсунович ЖЎРАЕВГА

 

 

Муҳтарам прокурор!

 

Ўзбекистон Инсон Ҳуқуқлари Жамиятининг ушбу мактубга илова қилинаётган маълумотномасида келтирилган факт юзасидан текширув ўтказиб, унинг натижаси билан Ўзбекистон Инсон Ҳуқуқлари Жамияти раҳбариятини таништиришингизни илтимос қиламан.

 

Толиб Ёқубов

 

Ўзбекистон Инсон Ҳуқуқлари Жамияти раиси